وصلت كندا ؟؟؟ وش تسوي

**ahmedali** · 02-04-2015, 06:25 AM

السلام عليكم ورحمه الله وبركاته

أعزائي أعضاء وزوار المنتدى العزيز والغالي على قلوبنا
حبيت أذكر لكم بعض الأشياء الأساسيه الي لازم تسويها أول ما توصل لكندا طبعا إذا كنت أول مره تروح

بسم الله الرحمن الرحيم

أول شي تسويه بعد ما توصل بالسلامه وترتاح وتفضي شنطتك وترتب أغراضك
بعد ما تدخل غرفتك دور على مكان أمين جدا جدا جدا توزي فيه جوازك حاليا ولا تقول يكفي أني أقفل عليه الباب لأن غرفتك راح يدخلها ناس في غيابك يعني راح يدخلها سواء كنت ساكن مع عائله ولا في سكن جامعي حط ذا الشي في راسك زين ويا شينها من حاله لو ضيعت جوازك هناك

أكتب عنوان سكنك في ورقه لا تضيعها وخلها معك في بوكك مثلا ولا تقول خلاص حفظت العنوان ترا أسامي الشوارع خصوصا في تورونتو متشابه ومتشابكه و يقل عندهم طرق سريعه علشان تحفظ عليها يعني الدعوه متاهه أنت جرب تروح وترجع من السكن على ذاكرتك في البدايه لكن خل الورقه معك لا تقول ما قالوا لي أعضاء المنتدى

ريحت الحين وخذت لك كاسين شاهي لا تتمدد أو تقول بأتلين شوي قم أنقز ورح لأقرب بنك أفتح لك حساب هناك حتى لو أنك ما شلت كاش أفتح حساب علشان تحط فيه أي مبلغ معك لو كان مئه دولار بس
بعض البنوك يمكن يقولون لك محتاجين كفيل
المدرسه الي تدرس فيها راح تساعدك في ها الشي وإذا كانت العائله الي أنت ساكن معها حبيبه هم بيكفلونك

حلو أطلع الحين وخذ لك لفه على حارتكم الي أنت ساكن فيها طبعا لا تطلع حاليا الا في النهار لين تعرف وش وضع الحي هو آمن ولا لا لأن فيه بعض الأحياء الشرطه تحذر من الخروج فيها ليلا ولا تعتمد على كلام العائله الي أنت ساكن معهم لأنهم أكيد بيسوون دعايه لحارتهم وبيقولون آمنه
طبعا الهدف من انك تاخذ لك لفه على الحاره هو أنك تعرف المحلات القريبه منك والي يمكن تحتاجها من وقت لثاني دور على أقرب بقاله دور على أقرب مطعم مثلا وتحس أنه مناسب ومحلات يمكن أنك تحتاجها علشان تعرف القريب منها والبعيد

طبعا خلال الوقت الي أخذت فيه لفه في الحاره دور على الباص ستوب الي هي لوحات مرسوم عليها باص وهي الأماكن الي يتوقف فيها الباصات وبإمكانك إنتظار الباص بالقرب من اللوحه
(الباص إذا ركبت فيه أطلب من السواق الترانزفير أو شي زي كذا هي عباره عن ورقه صغيره تثبت أنك دفعت للباص حق ركوبك وإذا أنت متوجه لمكان معين مثلا لازم تاخذ طريق متوجه شمال أول بعدين طريق متوجه شرق عليك أنت تركب الباص متوجه شمال وإذا وصلت للشارع الي تبي تتوجه عليه شرق أنزل من الباص ودور على باص ستوب ثاني على الشارع الي تبي تتوجه عليه شرق وإذا ركبت باص مره ثانيه لا تدفع يكفي أنك توريه الورقه الي أعطاك إياها الباص الأول ملاحظه الورقه هذي تمشيك ون واي يعني جهه وحده إذا تبي ترجع أدفع من جديد )

بالنسبه للدفع للباص بصراحه يسوي لك لخبطه أحيانا لأنه ممكن مايكون معك صرف والسواق ما يصرف لك بالعربي مهوب فاضي علشان كذا أنا أفضل أنك تروح لأي بقاله وتشتري تذاكر خاصه بالباص تكون أرخص وشيلتها أريح من شيل القروش والصرف

هذا بالنسبه للمواصلات مبدئيا بالنسبه للإتصالات نظام الإتصالات في كندا رخيص جدا جدا جدا لدرجه أنك تشتري كرت إتصال للسعوديه فيه 150 دقيقه بما يعادل 30 ريال طبعا إذا بتتصل على ثابت أرخص بكثير من أنك تتصل على جوال أنا أتكلم عن إتصالك بأهلك في السعوديه
كرت اإتصال تلقاه عند أقرب بقاله وأطلب منه الأفضل للإتصال بالسعوديه وأنا أذكر أنت بطاقه ثانكيو أفضل شي تقريبا
لأن الدقايق تفرق من بطاقه لثانيه حسب الدوله الي تبي أنت الإتصال عليها

إذا تبغا تطلع جوال علشان تكلم داخل كندا زملائك وأخوياك أنصحك تروح لشركه فايدو عندهم نظام شريحه جوال بمكالمات محليه مفتوحه يعني بدون فاتوره رسوم بس تكلفك تقريبا من 50 إلى 60 دولار شهري حسب الخدمات الي تبغا تضيفها عليها وطبعا كبدايه راح ياخذون منك مبلغ إضافي للتأسيس ما أذكر كم

* هنا أرجع أأكد على سالفه أنك تاخذ معك بطاقه فيزا أو ماستر كاد لأن فيه خدمات كثيره ما تقدر تدفعها كاش لازم يكون معك بطاقه إئتمانيه

بيني وبنكم مخي قفل وما عاد أذكر شي بس هذي الأشياء الأساسيه الي أذكرها وياليت من الأعضاء يشاركونا بتجاربهم ويذكرون الشباب بالي ما ذكرته لهم أو الي عندهم آراء ثانيه يضيفونها علشان تعم الفائده

والله يوفق جميع المسلمين