الموضوع: عروووس محتاجه مساعدتكم

السلام عليكم ورحمة الله وبركاته ..


انا دوم اتابع هالمنتدى وخاصة هالقسم لاني دووم اتمنى اسافر وازور دول مختلفة


لاني ولا مره سافرت للاسف والحيين ان شاء الله بسافر ولاول مره في شهر العسل وانا خاطري في جزر المالديف


بس مب عارفه كييف نرتب للسفره من حجوزات وغيره وكييف نبدأ بليييز ساعدوني ( ابي كل شي بالتفصيل الممل)


طبعا السفره لشهر العسل يعني لشخصين ، وراح تكون في شهر 9 ، كيف راح يكون الجو في هالشهر هل هو مناسب ؟

كم يوم نقضي في المالديف ؟ وانا ودي اسير مع المالديف بلد ثاني حلوو شو تقترحون علي بس ما يكون غالي
والوصول اليه سهل من المالديف

اعطوني اسم فندق ولا منتجع حلوو وراقي وطبعا يكون فيه فلل في البحر مع مسبح خاص اهم شي
ويكون نظيف ومرتب ( شفت كثير من الفنادق واحترت واايد ومب عارفه شو اختار سااعدوني )

واذا كان 5 ايام كم المبلغ اللي يكفينا ؟؟
كم درهم اماراتي يعني

و سعر التذكره راح يكون بكم ؟ على الدرجه السياحيه

ابي حد يحط لي مخطط كاامل يعني من الحجوزات ... الى ... وقت توديعنا للجزيره بليييز
ابي اعرف كيف ابدأ من البدايه

وفي شي مهم انااا ما اعرف اتكلم انجليزي الا شوي شوي كلمات بسيطه وزوووجي ابد مييح ههههه اخااف نتوهق هناك

بشو تنصحونا من هالناحيه ( ناخذ مترجم الكتروني ويانا ههه )

وكيف نرتب للنشاطات في الجزيرة ونستمتع هناك ؟


واذا في اشياء ثانيه ما اعرفها ولازم احطها في الاعتبار خبروني عنهااااااا بلييييييييييييييييييييز
ساعدووووووووووووووني



وادري ما بتقصرون ومشكورين

مواضيع عشوائيه ممكن تكون تعجبك اخترناها لك:

• استفسار مهم للي يعرفون المالديف؟؟
• استفسار من الخبير وخبراء المالديف
• سوال مهم عن المالديف
• الدليل المختصر لمنتجعات المالديف الجــــ الثاني ــــزء
• استفسارات بسيطة عن المالديف
• لو سمحت ؟
• طلب
• لخبراء موريشوس محتاج نصيحتكم وفقك الله
• حجزت على موريشيوس وانا ماعندي اي فكرة
• استفسار بخصوص شهر عسل ضروري
• سؤال مهم جدا عن المالديف
• استفسار عاجل للمالديف
• كونراد المالديف وتحقق المراد
• تكفوووووووون دلوني
• العريس يبي شووركم موريشوس والمالديف لشهر العسل
• ممكن مساعدة
• اللي عنده خبرة بالسفر لجزر المالديف
• بانيان تري جروب تضم منتجعا جديدا في جزر المالديف
• جزر ألمالديف
• تفاصيل حجوازتي لموريشيوس في الصيف القادم

وعليكم السلام ورحمة الله وبركاتة


أهلا اختي روز كازان وأن شاء الله نقدر نساعدك بكل مانقدر من معلومات وترتيب حجوزات سفرتكم بأذن الله







طبعا السفره لشهر العسل يعني لشخصين ، وراح تكون في شهر 9 ، كيف راح يكون الجو في هالشهر هل هو مناسب ؟





الجو مناسب ولكن افضل الاوقات من نوفمبر الى آبريل






كم يوم نقضي في المالديف ؟ وانا ودي اسير مع المالديف بلد ثاني حلوو شو تقترحون علي بس ما يكون غالي
والوصول اليه سهل من المالديف






المالديف أقصي مدة له أسبوع تقدر تقسمها بين منتجعين او منتجع واحد ودولة اخري اقرب شي للمالديف سيرلانكا ولكن تقدرين تطلعين اي مكان تبينه من المالديف بس مااقدر افيدك لاني مااعرف ايش هي اقرب الوجهات وراح تكون تكاليف التذاكر غالي





اعطوني اسم فندق ولا منتجع حلوو وراقي وطبعا يكون فيه فلل في البحر مع مسبح خاص اهم شي
ويكون نظيف ومرتب ( شفت كثير من الفنادق واحترت واايد ومب عارفه شو اختار سااعدوني )






المنتجعات كثيرة وماراح اذكره على سبيل الذكر لا الحصر (( كونراد , دبليو , شانغرالا , ون اونلي , الهلتون فوشية , الشيراتون فل مون , الفور شيزون , كورمبا , انتار ديغو )) وهناك العديد من المنتجعات فالمالديف





واذا كان 5 ايام كم المبلغ اللي يكفينا ؟؟
كم درهم اماراتي يعني







المبلغ يتوقف على حسب الوحدات السكنيه والتذاكر ولكن بشكل عام ممكن يزيد هالمبلغ اللي راح اذكره لك وقد يقل من 20 ألى 25 ألف درهم







و سعر التذكره راح يكون بكم ؟ على الدرجه السياحيه





ممكن يكلف من 4500 الى 5000 على الاماراتيه والسيرلانكيه من 3000 الى 3500 على حسب توفر المقاعد في الطيران والدرجات وعندك ايضا الاتحاد ولكن تتوقف في سيرلانكا ومن ثم للمالديف وعندك القطريه بعد تروح والعمانيه واسعار التذاكر على العموم راح تتراوح من بين 3000 الى 5000 للشخص







ابي حد يحط لي مخطط كاامل يعني من الحجوزات ... الى ... وقت توديعنا للجزيره بليييز
ابي اعرف كيف ابدأ من البدايه






البداية تكون من خلال زيارتك لتقرير الاعضاء لمعرفه مستوي المنتجعات والخدمات المقدمه من قبل المنتجعات ومن ثم زيارة الاماراتيه للعطلات وايضا مكاتب السفريات الكبرى بالامارات والطلب منهم عمل جدول لعرسان لمدة خمس ايام في المالديف ودولة اخري وشوفي اقتراحاتهم اللي يقدمونها لكم واحنا حاضرين لمساعدتك هنا واخذي لفة على مواقع الانترنت بعد وشوفي الاسعار التذاكر والسكن






وفي شي مهم انااا ما اعرف اتكلم انجليزي الا شوي شوي كلمات بسيطه وزوووجي ابد مييح ههههه اخااف نتوهق هناك

بشو تنصحونا من هالناحيه ( ناخذ مترجم الكتروني ويانا ههه )






ماتحتاجون مترجم ولا شي سهل التعامل فالمالديف والكلمات البسيطه هي الاهم فلا تخافين من هالناحيه







وكيف نرتب للنشاطات في الجزيرة ونستمتع هناك ؟






الترتيب بعد الوصول أن شاء الله للمالديف واخذ جدول الخاص بالانشطه من ادارة المنتجع والانشطه هناك معروفه ماتتعدي الالعاب البحريه والغوص ورحلة صيد سمك وانشطه ترفيه بسيطه اخري




أتمني أكون قد وفقت بالاجابة على استفساراتك واي سؤال اخر حاضرة للرد عليه

مرحبااا اختي اخت الم تسلميييييييييييييين ومشكووورة وايد على الافادة وما قصرتي

وعيبتني فكرة ان نقسمها على منتجعين شي حلوو صراحه انا ماخذه فكره عن المنتجعات وكنت محتاره وانتي حيرتيني اكثر لان ابي مكان محدد ومضمون ومجرب

وراح اطلع مره ثانيه عليها ان شاء الله

ومشكووورة مره ثانيه حبيبتي

ربي يوفقك حبيبتي ويسعدك ربي في كل خطوة واكيد هذي فرصة ماتعوض شهر العسل رغم اني مارحت شهر عسل بس يقولون انها فرصة ماتتعوض
ربي يوفقك

الله يووفقج ويهننيج يااربي

ختيه انا اقترح عليج سيرلنكا الدوله الثاانيه
الصرااحه طر انا يااي قبل شهر وكان الجو حلو وقالو الموسم اعتقد 8 و9 و10 و11 يعني الامور طيبه بتكون

سيرلنكا جنه
يوومين بنتووته ويوم نوريلااا ماعرف انطقها صح ههه ويووومين كااندي وبس العااصمه ماافيها شي الصرااحه

ويااج فدييتج ويوفقج .. سيرلنكا اربيعتي كانت سايرتنها وتقول فنادقهم مب نظيفه وحشششرات وغيره

وتقول ندمت انها سارت وما شجعتني ، بس يمكن على حسب المنطقه والفندق اللي سايرتنه

عالعموم مشكوره فدييتج

من وجهة نظري اعتق جزر المالديف مملة يعني 5 ايام وكثيره بعد - مثل ما اقترحو البعض سيرلنكا جميله وممكن تقظون عدة ايام فيها - ممكن خط السير يكون دبي اوو ابوظبي - كلمبو -مالي - كلمبو -ابو ظبي وتوزعين الايام على الاثنين -وصاحبتك ما ادري وين ساكنه لكن الفنادق نظيفه وحلوه

المشاركة الأصلية كتبت بواسطة روز كازان
http://www.arabtravelersforum.com/tr...0/#post5651106

السلام عليكم ورحمة الله وبركاته ..


انا دوم اتابع هالمنتدى وخاصة هالقسم لاني دووم اتمنى اسافر وازور دول مختلفة

وادري ما بتقصرون ومشكورين





ا

ألف مبروك أختي على الزواج وربي يتمم عليكم بالخير

أتمنى من القلب أن تساعدينا مثل ماتبينا نساعدك وتحددين ميزانيتك لهذه الرحلة

راح توفرين الوقت على الكثير

ونصيحة لوجه الله لا تخربين شهر عسلك بسريلنكا ولا حتى بالتفكير فيها لانها غير مناسبة لكي

من ضمن الاقتراحات الرائعة هي ضم المالديف مع باريس

او المالديف مع سنغافورة

او ضم سيشيل مع موريشيوس اللي أفضلها بكثير على كل ماذكر كوجهة شهر عسل خاصة في شهر9 ميلادي

ابو عزيز وش ناوي تبي تدوخ البنية بشهر عسلها ضم المالديف وباريس - يعني سافري المالديف اربع ساعات -بعدها باريس9 ساعات من الشرق للغرب -حرام عليك

المشاركة الأصلية كتبت بواسطة بيرم
http://www.arabtravelersforum.com/tr...8/#post5658488

ابو عزيز وش ناوي تبي تدوخ البنية بشهر عسلها ضم المالديف وباريس - يعني سافري المالديف اربع ساعات -بعدها باريس9 ساعات من الشرق للغرب -حرام عليك

ليه لا خاصة ان حلم أي فتاة أو عروسة أن تصبح الصبح وهي تسبح في بحر المالديف ووقت الغروب يكون الشاطيء ملك لها مع زوجها وفي أخر الليل تتعشى على ضوء القمر على شواطيء المالديف وتصبح الصبح وهي على الشاطيء تقوم بعدها تتوجه للمطار وماتحصل نفسها الا يدها بيد فارس أحلامها في أعلى برج أيفيل وبالعصر تتمشى معاه في حديقة قصر فرساي وفي المساء جالسة في كوفي شوب و ايسكريم هاقين داز على الشانز و اليوم اللي بعده تكون في قلب ديزني تتصور مع ميمي وميكي ماوس

ومو شرط يكون كلامي هذا خيال

ممكن يكون سرد لواقع ملموس


وتجربة شهر عسل جميلة


قبل 14 عام

اكيد ناويلك نية على هالزوج المسكين - ناوي تخليه طول عمره يسدد ديون شهر العسل - ثم يلعن العسل والنحل اللي جابوه

المشاركة الأصلية كتبت بواسطة بيرم
http://www.arabtravelersforum.com/tr...6/#post5659106

اكيد ناويلك نية على هالزوج المسكين - ناوي تخليه طول عمره يسدد ديون شهر العسل - ثم يلعن العسل والنحل اللي جابوه

لا مو ناوي اي نية

لهذا السبب طلبت من زوجته تحدد لنا الميزانية

انا اقترح المالديف مع سنغافوره

مشكووورين على الردوود ضحكتووني

بو عزيز عيشتني الجو صراااحه

امم تقريبا ميزانيتناااا 20 الف الى 23 الف هههه مابي اوصل لل25

لان للحين ما حطينا ميزانية محددة ، وعلى حسب المصاريف الاخرى بنحدد ميزانية السفر


بس تقريبا 20 - 23 الف

بمبلغ مثل ما ذكرتي ممكن تجلسون اسبوعين في سيرلنكا في فنادق حلوه مع سياره خاصه بسواقها وتزورون ثلاث مناطق -كاندي -نورليا - وبنتوتا -لا وفيها ميزة لك -لان الزوج العزيز ما راح يزوغ بصره لاهنا ولا هناك لان النساء هناك ما فيه ما يفتح النفس -بتصيرين ملكة جمال عندهم