السلام عليكم ورحمة الله وبركاته
لأني استفدت من هالموقع فسوف اذكر تجربتي في استخراج الفيزه في مدة وجيزة بفضل الله ونعمته وحده ومن ثم ما استفدته من التجارب السابقة في الموقع الطيب فقولوا ما شاء الله تبارك الله.
تأخرت قليلا في كتابة تجربتي لإنشغالي بالعمل عموما انا رايح لأمريكا لعلاج اصغر أبنائي فأسأل الله أن ييسر الأمر ويجعل في هذه الرحلة سببا لشفائه ورفعة في الدرجات لنا وله.
بعد التسجيل في موقع القنصلية وتعبئة المعلومات واللازم منه في وسط شهر مار س عطوني موعد في آواخر شهر يونيو وهذا بعيد جدا لأن عندنا موعد في آخر ابريل،قدمت على طلب حالة طارئة كما في الموقع وارفقت لهم التقرير الطبي والموعد في امريكا وقدموه الى 4 ابريل وهذا شئ ممتاز .
طبعا جهزت الأوراق المطلوبة وغير المطلوبة من باب الإحتياط ومن زود الحرص صورت زوجتي صورتين وحده كما في الجواز بالحجاب مكشوفة الوجه فقط والثانية كما مطلوب في الموقع مكشوفة الأذنين ومنابت الشعر من كثر ما خفت يرجعونا عشان الصورة.
السبت 4 ابريل رحنا للموعد انا وزوجتي بدون الولد لأن عمره صغير ولا يلزم حضوره في قنصلية الظهران وكان موعدنا الساعة 8 وصلنا هناك 7 وقالنا السكيورتي الهندي بيدخلونا الساعة 7:30 وفي الموعد صفينا طابور وكان عددنا قليل لأنهم ما يدخلون الا قبل الموعد بنصف ساعة فاللي موعده 8 يدخلونه 7:30 واللي موعده 8:30 يدخلونه 8 وهكذا،بعد التفتيش وتدقيق الأوراق والتأكد من انه عندك موعد دخلنا الصالة اللي فيها الأرقام وتسليم الأوراق وصراحة ما توقعتها كذا كانت صغيرة وامكانيات بسيطة عموما أخذت رقم وكان قبلي 3 فقط،بدأو ينادون بالأرقام تقريبا 8:05 واللي لفت نظري وجود عدد من الموظفين السودانيين وكنت متوقع كل شي امريكي في امريكي،وصل دورنا تقريبا 8:30 وكان مع أخ سوداني أخذ الأوراق وشيك عليها وطلب الصور واعطيته الصور بما فيها صورة زوجتي زي اللي في الجواز وقال لي عندك غيرها واعطيته الصورة الثانية اللي شكلها بصراحة يضحك وشكله كان ناوي يمشي الصورة الأولى لو قلت له ما عندي غيرها ولكني استعجلت واعطيته الثانية ،للمعلومية الصورة اللي راح تكون في الفيزه هي الصورة اللي ياخذونها مع الأوراق وكنت متوقع ان الفيزة بدون صورة حسب خبرتي السابقة في السفر الى اوروبا بحكم دراستي هناك،بعد كذا سألني عن الفورم DS-157 لي انا فقط وهل عبيتها ولا يعطيني وحده اعبيها بيدي طبعا انا محتاط وجهزتها لنا احنا الثلاثة من موقع القنصلية على الرغم انه ذاكرين ان هذي الفورم الإضافية تطلب فقط لبعض الجنسيات وليس من ضمنها الجنسية السعودية ،اعطيته الفورم وذكر لنا انه عندنا مشكلة وهي ان الولد مضاف بجواز امه والمفروض يكون لوحده ولكن علينا الإنتظار وسيتم استدعائنا مرة أخرى لإنهاء الإجراءات.كنت خايف يطلب ان زوجتي تكشف لمطابقة الصورة ولكنه لم يفعل وكنت الاحظ الشباك الآخر يطلبون ذلك.رجعنا للجلوس وكانت الكراسي والصالة مليانه والواقفين كثير.لم يطل انتظارنا ونادونا من شباك غير الأول وكان فيه وحده سحنتها عربية ولكن لهجتها امريكية وطلبت انا نبصم وطلبت من زوجتي تكشف الوجه لمطابقة الصورة وبعدين طلبت منا الإنتظار،بعد تقريبا ثلث ساعة نادتنا وحده امريكية(واضح من شكلها وكلامها وكانت دبا يعني متينة) وفيها شوي زعاطة على شوي إستهزاء من شباك ثالث وطلبت ان نبصم هذي المرة بالسبابة والإبهام فقط مع كشف الزوجه ايضا للوجه،كانت تشيك على الأوراق وتطالع الجهاز بين لحظة وأخرى وسالتني عن سبب السفر ووين سافرت قبل وذكرت لها الدول اللي رحت لها بما فيها دراستي في بريطانيا ودورات تدريبية في هولندا وغيرها وسألتني عن مكان الدراسة والتخصص وبعدين قالت ليش ما ذكرت هذا في الورقة الإضافيةds-157 اللي طلبها مني السوداني واتضح اني نسيت اعبي هالمعلومات وطلبت اني اعبيها ورجعها بعد ما اخلص،عبيت المعلومات واشرت لها لأن عندها واحد وزوجته وقالت تعال وخذتها وقالت الآن كل شي تمام ولكن علينا إحضار جواز للولد لإنهاء الأجراءات واستلام الفيزه وسألتها هل هو ضروري وأجابت نعم وعطتني الجوازات مع ورقة صفراء مكتوب فيها انه مطلوب جواز للطفل وبعد ما اطلع جواز الولد ارسلها مع فيديكس ويخلصون الفيز ويرجعونها ايضا عن طريق فيديكس.
خرجنا تقريبا الساعة 10 ووصلت مقر الجوازات السعودية على أذان الظهر طبعا بعد ما رحت للبيت وريحت شوي وبفضل الله ثم مساعدة الطيبين استلمت الجوازات تقريبا الواحدة والنصف من نفس اليوم يعني ساعة ونصف وصراحة اول مرة تصير معي وبعد صلاة العصر دايركت على فيديكس وارسلت الجوازات للقنصلية وارسلوا لي فيديكس رسالة يوم الأربعاء 8 ابريل لإستلام الجوازات وبيني وبينكم شكيت ان الجوازات رجعت بدون الفيز لخطأ ما ولكن عندما استلمت الجوازات وجدت الفيز ملصقة بالجوازات ومدتها 5 سنوات ولله الفضل والمنة والحمد من قبل ومن بعد وشكرا للجميع واسمحوا لنا على الإطالة.مواضيع عشوائيه ممكن تكون تعجبك اخترناها لك:
- رحلة الي امريكا
- رشح اجمل منتجع في اورلاندو
- جنسيتي أمريكية
- استفسار بسيط وارجو المساعدة
- الى خبراء ولاية اوريجون ، احسن المناطق ، المدن ، السكن ؟ لا تبخلوا علي
- الى الاخ امباكت وكافة الخبراء
- لدي فيزا في الجواز القديم
- ياليت مساعده
- اخوكم الخطاف يناديمعلومات عن روشستر وعيادة مايو كلنك والاماكن والفنادق والشقق
- إش أرخص خطوط جوية للتنقل بين مدن أمريكا؟؟
- المساعده في اختيار فندق بهونولولو
- ضروري معك دبلوم وش تسوي
- كيف أعرف رقم تليفون أي فندق بأمريكا
- هل ممكن اخد موعد لفيزا طالب من غير
- ما هو إختبار ؟؟
- تم اعتماد قبولي من قبل مركز القبول بعد انتظار طويل في الاسياب
- رحلتي بعد ثلاث ايام ساعدوني ابي فزعتكم
- اختكم مسافرة على كاليفورنياوابي مساعدة عن مدينة كلير مونت
- موعدي بعد اسبوعين وعندي استفسارين
- ارجو المساعدة من اصحاب الخبرة
رد مع اقتباس
المفضلات