الموضوع: موعدك في القنصلية بالظهران فضلاً اقرأ

السلام عليكم

من زيارتي للقنصلية الأمريكية بالظهران استفدت كم معلومة و قلت أضيفها هنا للفائدة :smile:

لا تروح بدري .. رح على موعدك فقط
مواعيد الساعة 8 و الساعة 8,30 يكون دخولهم الساعة 8
مواعيد الساعة 9 و الساعة 9,30 يكون دخولهم الساعة 9
استفيد من وقتك أفضل لك ( فيه قدامي ناس انتظروا أكثر من ساعتين بالسيارة )

أولاً : دخول مع بوابة المواقف و السيكورتي قدامك يعلمك وين توقف سيارتك .

ثانياً : تدخل مع أول تفتيش يشيك على موعدك و يفتشك بجهاز ( لا تأخذ جوالك معك و خفف أغراضك قدر الإمكان ) , و بعدها تلقى قدامك سرا تحت مظلة توقف مع الناس الواقفين فيه ( قبل لا تدخل السفارة ) و تستمر بالسرا هذا حوالي نص ساعة .

ثالثاً : دخولك لمكتب صغير أمام السفارة يتأكدون من موعدك و يفتحون لك الباب , تترك المفاتيح ( و يعطيك رقم لها ) و تمر بجهاز تفتيش ( مثل اللي بالمطارات ) , و تدخل للسفارة نفسها من باب آخر .

رابعاً : بعد ما تدخل مبنى السفارة تلقى 3 مباني بينهم حديقة صغيرة و ممشى على يمينك تقريباً .. أول واحد قريب منك و مبنى كبير بالمنتصف و آخر واحد بيكون أمامك تقريباً مكتوب عليه " القسم القنصلي " تدخل هناك و يعطونك رقم ( المكان مكيف و فيه كراسي للانتظار و قدامك 4 شبابيك مثل البنك مرقمّه من واحد إلى أربعة ) اللي على اليمين مرة هذا الصندوق ما شفتهم استخدموه إلا مرة وحدة عندهم رفضهم لفيزة شخص أظنه سوداني , بنفس الصالة يوجد مكتب فيدكس و 2 موظفين فلبينيين .

خامساً : بعد انتظارك لحوالي 40 دقيقة يظهر رقمك على الشاشة و جنبه مكتوب رقم الشباك اللي تروح له ( و تستمر بالرقم هذا طول مدة بقائك في الصالة هذي ) و يشيكون أوراقك مبدئياً و يتأكدون من تعبئة النماذج , و ترجع تنتظر بعدها حوالي ساعة كاملة , و بعدين ينادونك من جديد بنفس الرقم و يسألونك شوي ( أنا سألوني عن الفيزا السابقة و كذا شئ عادي جداً ) .

سادساً : تنتظر مدة بعدها و بعدين تروح للشباك من جديد بعد ما ينادونك و يقابلك غالباً نائب القنصل و يسألك بعض الأسئلة و هنا يكون لك 3 خيارات : تأخذ ورقة لونها أزرق و تترك جوازك و أوراقك و تروح تدفع لفيدكس و تنتظر جوازك يجي بالفيزا معاه :smile: , أو تسلم لهم أورقك تأخذ ورقة لونها أحمر/وردي و يقولون لك نتصل عليك تودي جوازك لفيدكس و يطمنونك إنها مسألة وقت من 3 إلى 6 أسابيع , او تطلع بجوازك و اورقك بدون فيزا و لا شئ .



حبيت إن الكل يستفيد من المعلومات :smile:


ملاحظتي إن السيكورتي ( من الجنسية الهندية ) مسوين الكل في الكل و يتفلسفون حبتين , لدرجة إن واحد منهم خلى عائلة هندية تمشي قبل الناس و تدخل السفارة بس ربك خلاهم يطلعون بدون ما يقبلون نماذجهم اللهم لك الحمد

مواضيع عشوائيه ممكن تكون تعجبك اخترناها لك:

• السلام عليكم وش افضل مكان في سان دييقو
• بطاقة إئتمانية لاستخدامها في أمريكا
• مكتب تعقيب لإصدار الفيزا الأمريكية
• ابغى افضل ولاية
• مصري وخطتي للفيزا هل هي مقنعه ام لا
• كييم متواجد في لاس فيجاس اي استفسار ؟
• شكر واستفسار
• نصائح قبل تعبئة نموذج
• طريقه للي يبي موعد قريب من السفاره
• استفسار ضروري الله يخليكم جزر الكاريبي
• بخصوص استئجار السياره بامريكا هام جدا
• ساعدوني ياخبراء امريكا
• أماكن التسوق في لوس أنجلوس
• ما هي الأماكن السياحية في لوس انجلوس و سان دييغو؟
• مش عارف اقول لكم باركولى ولا لسة فى شك ارجو من الخبراء الدخول
• الاخ ارجو التكرم بالمساعده
• مساعدة لنيويورك
• من استفسار عن لوس انجلس
• ساعدوني بين أمريكا وبين أوروبا
• الحصول على التأشيرة بكل يسر وسهولة

شكرا لك أخي بشر عسى أمورك تمام

هلا اخوي wert

والله نقول تمام بإذن الله

بس أنا قابلتني وحدة غير مساعد القنصل ( الظاهر إنها مستجدة و جايه تساعده ) و كان كل شئ ماشي كويس إلى أن شافت كشف حساب لي في Bank Of America ( بعض الصدق ما ينفع بيني و بينك :smile: يعني لو ما حطيته الظاهر كان مشت أموري على طول ) و قالت : وشلون تفتح حساب بدون SSN ( سوشال سيكورتي نمبر ) ؟؟ قلت لها : هذا حساب طالب ( و فعلاً وقتها كنت طالب ) و راحت لمساعد القنصل تسأله و بعدها جت و أعطتني الورقة الحمراء/الوردية ( طبعاً هي ما سألتني عندي سوشال و إلا لا , و أنا ما قلت لها شئ ) , و الغريب إنها أكدت لي و قالت لا تخاف 3 إلى 6 أسابيع و نطلب جوازك و تأخذ الفيزا لمدة خمس سنوات و أكدّت على كلامها هذا مرتين و قالت انتظر من القنصلية إيميل او اتصال


المشكلة الحين ما ادري متى المفروض أبدأ أحس بالقلق من التأخير ( و الحقيقة إني قلقان من الآن :unsure

عموماً الله يكتب اللي فيه الخير :smile:

أنا اليوم أخوي موعدي ولاناظر كشف الحساب عطاني ورقة سماوية فيها عنوان موقع اشيك معهم وعطاني رقم مكتوب على الورقة على شان أشيك معهم من بعد ثلاثة اسابيع واولادي خذو جوزاتهم وقالو بعد اسبوعين تجيكم مع شركة النقل كان الموضف للامانة مرح لكن مااستلم الجواز اللهريعين أنا بدأت بالقلق

عموما مبروك ان شاء الله

بس الله يهديك كان ما تعبت حالك وجبت لهم حسابك في Bank of America

خلك على بنوك السعودية ولا تجيب الكلام لنفسك

موفق أخوي

life heart

خلاص فات الفوت
بس أبغى رأيك الشخصي ... منطقياً المفروض كشف حسابي بأمريكا يساعدني و إلا يعقّد اجراءاتي ؟!
الموظفة ما أعتقد كانت ملمّة بعملها و هم ما يحبون يمشون شئ ما يعرفونه .. فقالت بنفسها أخليه يتأخر و أكون ضامنه وضعي أفضل .. لكن ربك يعين

يعطيك العافيه.. ومادري ليه .. المساله تطول .. 4 اسابيع الى 6 اسابيع

هذي صورة الورقة اللي أعطوني إياها عشان إذا اتصلوا فيني اوديها مع الجواز لفيدكس

اللي استلم مثلها يا ليت يبلغني كم انتظر بالضبط للحصول على الفيزا

ان شاء الله خير

ان شاء الله خير

بس اللي خلاها تشك هو حسابك اللي بأمريكا وأنت بالسعودية ... ممكن يعقد الامور "شوي" .... لانك انت الان متواجد بالسعودية ... والمفروض الراتب ينزل بالسعودية .... ليش تجيب لهم حسابك اللي بأمريكا ؟ وليش حسابك ما قفلته يوم خلصت من دراستك وما راح تكون مقيم هناك ... هم عندهم حساسية من أشياء حنا ما نلقي لها بال حاول تفكر بعقلية القنصل

عموما نصيحة لكل واحد يقدم .... حاول تكون طبيعي .. يعني زيك زي الناس الثانية ... جيب نفس الاوراق اللي ممكن أي سعودي يجيبها .... خصوصا اذا كنت رايح سياحة .... خلاص علاقتك بأمريكا الان اختلفت عن وقت يوم كنت طالب

عموما لا تخاف ان شاء الله أمورك زينة

يارب تسهل امورك ..

من جد متحمس ودي اعرف وش بيصير معك

شكرا على اثراء المنتدى بتجربتك وهذي نصيحة لجميع من يرغب بطلب فيزا بعدم اعطاء السفارة اي معلومات اضافية اوغير

مطلوبه قد تكون سبب في زيادة التدقيق والتحري عنك

السلام عليكم...

أخواني
أنا عملت المقابلة الأسبوع الماضي وكانت أوراقي كلها سليمة
إلا أن الصورة الخاصة بزوجتي ما كانت زي ما يبغون فأعطوني نفس الورقة
وقالوا أنهم بيتصلون علي علشان أرسل لهم الجوازات بالصورة والورقة طبعا

طيب
ما أقدر أرسل لهم الحين علشان تطلع الفيزا بدري؟ ولا لازم يتصلون علي
وقولون لي متى أرسلهم؟

وبالنسبة لللمدة هل من 3-6 أسابيع من استلامهم للجواز ولا من موعد المقابلة؟

رجاء فيدوني بالموضوع..مشكورين

المهاجر المغترب
نقول إن شاء الله تتسهّل :smile:

LIFE HEART
دعنا لا نبكي على اللبن المسكوب
و لكن تركي للحساب بأمريكا له أسباب ( عمرك حاولت تشتري شئ من النت مثلاً موقع Sony ببطاقة فيزا عنوانها من السعودية ؟ ) :smile:
أنا اعتقد لو كنت محظوظ بمقابلة القنصل أو نائبه .. كان مشت أموري تمام , المشكلة كانت في إن اللي عملت المقابلة معاي كانت مستجدة
ولكن ربك يعين

fms
أنا متحمس أكثر منك .. تجي نقيس من أكثر حماس ؟!

sam963
ان شاء الله يستفيدون اللي ناويين يقدمون الآن :smile:

m8s3n
والله يا غالي أنا نفس الوضع قالوا لي من 3 إلى 6 أسابيع و نتصل بك ترسل جوازك بالفيدكس
ما راح إلا أسبوع و ها نحن ننتظر .. اعتقد يبي لك تعطيهم فرصة شهر على الأقل


اللي أنا مستغرب منه إنهم ما اعطوني Case number ... فلا أقدر أتابع او شئ .. بس جالس أشيّك الإيميل كل ربع ساعة :smile:

انا بعد عطوني الورديه قالو بندق عليك بعد شهر توقعون بيدقون او لا

المشاركة الأصلية كتبت بواسطة smart1
http://www.arabtravelersforum.com/tr...5/#post2780475

انا بعد عطوني الورديه قالو بندق عليك بعد شهر توقعون بيدقون او لا



والله يا غالي ننتظر و نشوف
على فكرة .. لا تنسى الإيميل اللي عطيتهم
شيك عليه كل شوي .. يمكن يرسلون لك عليه

و إن شاء الله بيدقون
بس أخبرهم يقولون لا تسألنا قبل لا تمر 8 أسابيع
يعني لو طالت المدة تقدر ترسل لهم تستفسر

اهلين اخوي ......
بس ياليت تقول ايش صار معاك الحين ... ايش آخر التطورات ؟؟؟
@

أبشرك وصلت من أسبوع

و كتبت عنها موضوع بس يمكن إنك ما شفته

http://www.arabtravelersforum.com/travel267347/

موفق أخوي