الموضوع: مكاتب إجار السيارات والظلم المبين

بسم الله الرحمن الرحيم

من يحمي السائح من ظلم مكاتب إجار السيارات؟


ياحبي للكويت واهلها.احبها مثل ماحب السعودية

في بداية الاجازة الصيفية من العام الماضي استأجرت سيارة صني من احد مكاتب حي السالمية
ولما اردت اسلم السيارة لهم(وأنا مبسوط) قالولي لازم نفحص السيارة قلت:اوكي
رجعلي قاللي السيارة مصدومة!!!! كييييييييف؟

تصدقون ياجماعة!!!! مخش صغير برأس الأظفر وغرموني (80) دينار
وقالولي مانسلمك جوازك حتى تدفع حقنا.

واضطريت غصب عني أدفع لهم لأني كنت مستعجل وبرجع للسعودية
وقلتلهم (الله يمهل ولا يهمل) الله لا يسامحكم

والله المستعان

مواضيع عشوائيه ممكن تكون تعجبك اخترناها لك:

• الكويت الحبيبه
• سبب تسمية شارع الحب بهذا الاسم
• ايام الخصومات الرائعه من طيران الجزيرة
• عاجل متى يبدأ مهرجان هلا فبراير
• سؤال لأهل الكويت
• بخصوص فندق
• هل من يد مساعدة ؟
• ارغب بالسفر لكويت ايام العيد
• استخراج الفيزا ضرووووووووووري
• استفسار يا اهل الخير
• الدراسة في الصين
• صور روعة للكويت
• الجابرية للمعارض تقيم الأسبوع البريطاني بمشاركة شركة
• الطريق الجديد المختصر من الرياض الى الكويت
• الفزعه يااهل الكويت؟
• افخم فندق في الكويت وجديد
• ساعدوني قبل العيد تكفون
• عاجلا وليس أجلا انقذوني هيلب مي بليززز
• بليز اخواني مساعدة
• طريق السفر الي الكويت بر وطريق داخل الكويت

ياليت تكتب لنا اسم المكتب

إن شاءالله ما يتغير حبك لبلدك الكويت الثانية مثل حبنا لبلدنا الثانية السعودية
ومثل هالتجار ما يمثلون الكويت بطمعهم ، حتى تصير لنا يا الكويتيين هالأشكالية
إن شاء الله تتعوض

ما لك ومال الاجار ليموزين اريح لك

يابن دخيل والله مافيه مثل موترك اذا ستر الله عليك تدق سلف وسيده الكويت

ياليتك قريت شروط العقد قبل ان تستاجر منهم والله كان شاب راسك والحمد لله انها جات على كذا و المره الجاية
انشأ الله مثل ماقلت مالك الا موترك وان كان ولا بد فالشركات الرئيسية مثل ايفز وبجت وان كانت اغلى لكنها اضمن
لك من هذه المكاتب التعيسة التى للاسف لا يوجد قانون لتنضيمها واعتقد ان لها تاثير سلبى جدا على السياحة فى البلد
وعلى العموم شكرا لك على التنبيه من جشعهم واستغلاهم للناس

كان بخششت المسؤول بكم بيزة ويقولك خلاص سامحناك ،،،،،،،،،،،

ويه صج يفشلون هالمكاتب

المفرووض قبل ما توقع القعد وتاخذ السياره

لازم تلف دار مدار السياره واي زلق ولو صغير وما يذكر تسجله في العقد مكان رسمة السياره

وهذا اللي انا اسويه اذا رحت البحرين وبأجر سياره ادور دار مدار السياره وكل شئ اكتبه مثل الزلق او صدمه صغيره وغيرها

وبالاخير الله يعيينج والله يبعد عنك عيال الحرام

المشاركة الأصلية كتبت بواسطة q8taub
http://www.arabtravelersforum.com/tr...1/#post3631491

ياليت تكتب لنا اسم المكتب




والله إني ما أذكر اسم المكتب!!!! لكن من ضمن المكاتب اللي جنوب شارع المطاعم

أبداً.... ماراح يقلل من حبنا للكويت,,,,,,,,,,لأن مثل هالأمور ممكن تصير في كثير من دول العالم
لكن ياليت فيه جهه في كل دولة تهتم وتحافظ على حقوق السائح!!!!! أو انا غلطان؟

وتقبلوا تحياتي

في اي بلد في العالم
انصحك بشركات العالميه

هالموقف صار لي حتى بأوروبا...
صرت ماروح اللا لأفيس و بجت ,, لأنهم أفضل معنهم أغلى...

ألف لا باس عليك و السموحة يالغالي,,,

موقف لا تحسد علية
نصابين الصراحة

كان سويت لهم فيلم وكأنك تتصل بالشرطة او السفارة السعودية بين لهم انك ان انسان محترم ولك مكانتك صدقني يحترمونك ويخافون باين انك ما تبي تضيع وقتك ومستعجل وماتبي تعور راسك

80 دينار شكلهم نصابين


حصلي هالموقف لكن بدبي نزلت في المطار وشفت اسعار السيارات بمكاتب الايجار بالمطار زايدة شوي عن اللي برا ارخص خذيت مني اللي برا وحصل نصب ونفس طريقتك بعد ما سلمتها تغير وجهه وبيحسسني اني مسوي شي بالسيارة او مخربها المهم عطيتها شي بسيط من يومها ما آخذ الا من المطار لو كان شنو السعر اولا المكاتب عالمية ومعروفة ثانيا تسلم سيارتك في المطار وبالتالي ما تحتاج تاكسي وبهدلة وشيلة وحطت الشنط وخصوصا اذا كان معاك عائلة

تعوضها بالمال و تشرفنا ونور ديرتنا يزيارتك

مكاتب العالميه افضل بوايد

حياك الله انت وباقي الاخوان في دوله الكويت
سؤال بسيط
انت سبب الصدمه الي غرموك عليها؟
اذا كان الجواب نعم فلاحول ولا قوه الا بالله
وانت اخطأت وانا عارف ان 80 دينار مبلغ خيالي خصوصا في سياره حجمها مثل الصني واجارها اقل من 5 دنانير باليوم ولكن انت غلطت والله يعينك
انا عارف ان قضاء الله وقدره ولكن مكتوبه لك يا اخي
واذا كان جوابك ب لا يعني مو انت الي صادم فيها فكان المفروض انك اول شي تسويه تتصل على وزاره الداخليه (112) وتقولهم يرسلولك دوريه للمكان الي انت فيه ويسجلولك اثبات حاله بعدها تقدم شكوى على المحل في ( حمايه المستهلك ) بما انهم نصابين وحطوا الخراب فيك انت

على فكره
معلومه للجميع للامانه في اي بلد مو بس بالكويت
اذا كان حصل دعمه ( صدمه ) بالسياره وهي عندك حاول انك تصلحها انت بنفسك تكسي ياخذ منك 3 دنانير ويوديك للكراجات وتصلحها باقل من ربع السعر الي راح يطلبه المكتب منك

وللاخوان الي يقولون كان بخششت المسؤول الي بالمحل
اولا انت بالكويت والبخشيشه = نصب واحتيال
بمعنى
نفس الي حصل مع الاخ صاحب الموضوع
تصليح السياره ما يكلف 20 دينار وضرب هالمبلغ الخيالي منه عن طريق النصب شافه مو كويتي قال اضرب ضربتي وينتهي الموضوع
للعلم ان لو الاخ متفاوض معاه على السعر كان وصل معاه لل40 واقل ممكن
عموما
حمدلله على السلامه وخيرها بغيرها

للأسف انا اجرت مره سياره من نفس هالمكاتب الي عند شارع المطاعم عشان عرسي الايجار كان يوم واحد بس ولله ايدي على قلبي لغايه ما رديتها للمكتب طبعا قبل لا استلمها الموظف سجل كل زلق بالسياره على الرسمه الي بالعقد حتى الي ما ينشاف بالعين المجرده طبعا لزوم النصب و قالي شفت هالنقطه دفعنا المؤجر عليها 50 دينار (قمه النصب) على قوله احد الاخوان لو تصلحها بره ما يوصل ربع السعر
هذا غير انهم يوقعونك على كمبيالات حق التصليح و المخالفات ولله كنت خايف ينصبون علي و يلبسوني مخالفه ما سويتها بس الحمدلله هاليوم عدا على خير حتى رجعتها قبل لا اكمل 24 ساعه بس عشان ارتاح نفسيا

و مره رحت دبي و اجربت سياره من مكتب sixt كانت من نوع مرسيده slk طبعا استلمتها من المطار و رجعتها للمطار لما سلمتها جيك عليها موظف المكتب و قالي فيها دعمه سألته شلون يعني راح تدفعوني شي قالي لا ما يحتاج لأن عليها تأمين شامل و انت دافع رسوم التأمين مع مبلغ التأجير

و على فكره للعلم مكاتب السيارت بالكويت مأمنين سياراتهم شامل لكنهم ينصبون على الناس و ياخذون منهم فلوس مبالغ فيها و بالنهايه اهم يصلحون السياره على التأمين

زبده الحجي لا تفكر بغير الشركات العالميه و غالبا تكون موجوده بالمطار لأن التعامل معاهم اضمن و حتى لو صارت مشكله تقدر تراسل الشركه الام و راح يعطونك حقك

و ياريت هالشغله ما تغير نظرتك للكويت و اهلها و امسحها بويهنا