الموضوع: كيف رمضان بالكويت يا اهل الكويت

و عليكم السلام

اهلين خيتووو..



رمضان بالكويت الله يسلمج

اول اسبوع بعد صلاة التراويح
تلقين كل الحريم كاشخين و رايحين يهنون برمضان
استقبالات

اول يومين طبعا للاهل المقربين
و بعدها لـ باقي الاهل البعاد و الاصدقاء





ليله 13 و 14 و 15
يكونون مخصصين للقرقيعان
من اول ما يأذن حق التراويح يعني عالساعه 7.30 او 8 لغاية الساعه 11 او 11.30
اليهال يدورون بحثاً عن القرقيعان ^^



الصبيان لابسين دشاديش و قحافي و سديري
و
البنات دراريع و بخانق

و يغنون اغاني القرقيعان



اغنيه الصبيان:
سلم ولدهم يالله .. خله لامه يالله
سلم ( فلان ) يالله .. خله لامه يالله
سلم ( فلانه ) يالله .. خلها لامها يالله


اغنيه البنيات :
قرقيعان و قرقيعان بين اقصير و رميضان
عادت عليكم صيام كل سنه و كل عام
الله يخلي ( فلانه او فلان ) الله يخلها/يخله لامها/لامه ..
عسى البقعه ما تخمها و لا توازي على امها !









بالنسبه لاكلات رمضان المشهوره بالكويت :

الجريش
+
الهريس
+
التشريبه

و

الحلو:

المحلبية
+
اللقيمات
+
صب القفشة



بالاضافه للحلويات الشعبية اللي تتوفر طيلة العامه

مثل : الرهش و الزلابية..
















اتمنى اني افدتج
و اذا في شي غلط ان شاء الله الاخوان يصلحون و يزيدون عليّ !! D:

ما كو شي غلط كله تمام

بس حبيت اضيف شغله انه مو بس البيوت اللي تحتفل في القرقيعان حتى المدارس تحتفل يعني الابلات تطلب من الطالبات انه يلبسون دراريع وكل وحده وشطارتها اتييب معاها قرقيعان
وايضا مؤسسات الدوله يحتفلون وايضا الاسواق والمجمعات
اما بالنسبه حق البيوت عاد شوفي التنافس كل ربه بيت تتفنن في شكل ومحتوى القرقيعان
حتى اني اعرف وحده سوت حفله قرقيعان بس حق الكبار ويابت ستار بكس و وحده اتسوي صاج يعني حركات
ووووووووووووووووووووووبس

وشرفينا ابديرتج الثانيه الكويت باي وقت

حرم الملك

مثل ماقولوا لج الاخوان

رمضان وايد حلووووو بالكويت وانا شخصيا مااحب ارمض برا الديرة.

الاسبوع الاول زيارات وتهاني .

نص رمضان تبدي مناسبة القرقيعان ويحتفلون فيها البيوت والمارس .....الخ

بعد الفطور طبعا الناس تصلي المغرب وتتجهز حق صلاة التراويح بالمسايد.

وبالعشر الاواخر تقيم كل مساجد الكويت صلاة الجيام.

اشهر الاكلات:

الجريش

الهريس

التشريب

بالنسبة للسمك عادة مايؤكل الا قليل جدا جدا في رمضان.

الحلويات:

اللقيمات
صب القفشة
المحلبية
الكريم كريمل
الجلي

المشروبات:
عصير القمردين
شربة البيذان.

رمضان ايامه حلوة وشرح وممتع ودايما بليل بالشوارع حركة مافي خوف

وتبدي تقريبا من نص رمضان او قبل شوي القبقات ( عبارة عن تجمع الاهل في احد البيوت لتناول السحور مع الاقرباء وممكن تكون بداواوين بين الرياييل)