و عليكم السلام ورحمة الله وبركاته
راج أجاوبك باللي أعرف لأني لسا راجعة من ماليزيا
بالنسبة للسفر من بينانج إلى الكاميرون و من ثم إلى كوالا .. أفضل طريقة برأيي هي التاكسي لأني جربت الباص هو صحيح مريح بس الرحلة فيه تطول لأنه يوقف في عدة محطات خصوصا من بينانج إلى الكاميرون فصارت رحلتنا 6 ساعات
وبالنسبة للأسعار أنا ما أدري كم عددكم بس سعر التاكسي الكبير ب 550 رينجت بس أسرع و أفضل من الباص
لكن اللي خلاني أسافر بالباص هو السعر فكلفتنا الرحلة لسبع اشخاص 250 رينجت بس
وبالنسبة لحجز الباص من بينانج .. اطلب من أي تاكسي يوصلك لمحطة سونقاي للباصات و لما توصلها اسال أي مكتب فيها عن رحلات الكاميرون لأنه مو كل الباصات تودي لها
عندهم شركتين فقط تودي للكاميرون أي مكتب عندهم يحجز لك عندها .. وحدة فيها الصف الأفقي ثلاث كراسي والثانية أربع كراسي يعني الأولى أوسع و كلهم بنفس السعر الشخص 35 رينجت
وباصات مو مليانة .. عدد الأشخاص قليل مرة
و لما توصل الكاميرون راح توقف في محطة تاناه راتا للباصات و هي المحطة الوحيدة في الكاميرون
وراح تلاقي فيها مكتب واحد لحجز الرحلات إلى كوالالمبور و مافيها مجال إنك تختار باص معين إنت وحظك بس عموما باصاتهم واسعة و نظيفة
إنت عليك بس تختار وقت الرحلة لأن عندهم خمس رحلات في اليوم إلى كوالا ,, اختر اللي يناسبك منها لأن الباصات تكون فاضية تقريبا
هذا اللي أقدر أفيدك فيه من خلال تجربتي
اتمنى لكم رحلة موفقة بإذن الله ..
رد مع اقتباس
المفضلات