الموضوع: معلومات عن شاليهات بلاج الجزاير

السلام على جميع الأعضاء..

اتمنى لو أحد يساعدني بخصوص شاليهات بلاج الجزاير..خبري فيهم من عشرين سنة.

ابي اعرف شلون الوضع هناك...من ناحية نظافة البحر، نظافة الشاطئ..نظافة التراب..ماي الحمامات (الله يعزكم) لليحين مالح لو عدلوه.؟

هل في ملاعب العاب للأكفال من دوارف و زحاليق؟؟

هل تنصحوني ارد ادور على شاليه لو اغض النظر (ادري بتقولون وايد واثقة الاخت انها بتحصل شاليه، بس باحاول) وترا كله يعتمد علي توصياتكم.

بأنتظار ردودكم ....وآرائكم...

تحياتي
غلا المنامة

مواضيع عشوائيه ممكن تكون تعجبك اخترناها لك:

• سؤال ؟؟
• الرحلات البحرية للعروسين في البحرين
• دخول مقيمي السعوديه للبحرين
• وش رايكم بسعر الشيراتون؟
• لطرح استفساراتكم عن فنادق وشقق البحرين تفضلوا هنا
• الفزعه الله يخليكم
• استفسار بخصوص مكاتب التأجير
• ضروري جداً لاهل البحرين
• يااهل البحرين او الي زاروها
• الدخول لمن هم اقل من سنة ارجو الرد
• البحرين تجني مليون دينار من السياحة الوافدة في
• جسر البحرين
• ارقام تليفونات و اماكن مطاعم البحرين
• الكرنفال السنوي للسياحة في البحرين بعد يومين
• آي هوب
• فندق الكومدور
• هل يشترط دفتر العائلة في فنادق البحرين مهم جدا لذوي الخبرة
• لدي رحلة من دبي إلى البحرين فهل يلزم الجواز
• زين الاتات
• تفويض السيارة للخروج إلى البحرين

حبيبتي غلا المنامه

انا الوالده بعد تحن تبي شاليه
متحسفه انها باعت الشاليه الي كان عندنا

عموما عن قبل واااااااااااايد تغير المكان والشاليهات الكبيره حلوة جنها شقه
والمكان نظيف وكلشي متوفر

بس اسعارهم وايد يعني ماقصد اسعار الايجار وانما اسعار الخلو
يعني الواحد حق يطلع من الشاليه ويسلمج اياه تدفعين له 10000 دينار تخيلي بس عن طلعته
وبعدين تدفعين ايجار شهري على حسب كبر الشاليه وقربه من البحر

وعلى قولتج اذا حصلتي واحد كلمه ابوي حق يفتك من حنه امي خخخخ

عزيزتي الماسة...

مشكورة على الرد السريع.......

لو على 10000 جان امرها هين، تدرين واحد حاط اعلان في الوسيط يبي فيه 18000 و الثاني يبي فيه 25000 يوم سألته شوله قال الايسية سبلت!!!!

بس بصراحة خايف لأن الكل يتكلم عن المشرع السياحي الجديد الي بيحل محل الشاليهات...سمعتي شي عنه؟؟

غلا انا اقول اخذيلج طقم الماص وانا اختج انفع لج خخخ
الصراحه حرام الي يسوونه والمفروض في رقابه على هالشي
لكن شتقولين ..

والمشروع ماسمعت عنه بس لو سوووه مو من حق احد يقول شي لان اوردي الشاليهات مو ملك
يعني تخيلي تدفعين عليه 25 الف واخر شي يجحوتونج منه وماتقدرين تعترضين

احنا عندنا شاليه وسمعنا بالمشروع .. المشروع موقعه اول العرشان .. لكن من بداية الشاليهات الاجار بيتمون تابعين حق البلديه نفس الشي يعني مابيتغير ان شاءلله ..

الشاليهات صايره وايد حلوه الناس مهتمين فالمكان .. والحمدلله تكاد تكون الازعاجات معدومه .. وصاير كلنا نعرف بعض كأنا فريج واحد
احنا عندنا شاليه او وايد مرتاحين وفي اخ كان حاط موضوع مصور للشاليهات ..
لكن مثل ماقلت صارت الاسعار 20 000 وفوق ولو بتاخذه بأقل بيكون اكيد يحتاج تصليح يكلف هالحدود ..
احنا من سنه او زود شريناه ب10 000 دينار او اشتغلنا عليه باكثر من 7000 وعرضو علينا 20 لكن مانبي نبيع .. ولا نعرف احد حوالينا يبي يبيع ..

المشاركة الأصلية كتبت بواسطة OZYEEE
http://www.arabtravelersforum.com/tr...9/#post2443589

احنا عندنا شاليه وسمعنا بالمشروع .. المشروع موقعه اول العرشان .. لكن من بداية الشاليهات الاجار بيتمون تابعين حق البلديه نفس الشي يعني مابيتغير ان شاءلله ..

الشاليهات صايره وايد حلوه الناس مهتمين فالمكان .. والحمدلله تكاد تكون الازعاجات معدومه .. وصاير كلنا نعرف بعض كأنا فريج واحد
احنا عندنا شاليه او وايد مرتاحين وفي اخ كان حاط موضوع مصور للشاليهات ..
لكن مثل ماقلت صارت الاسعار 20 000 وفوق ولو بتاخذه بأقل بيكون اكيد يحتاج تصليح يكلف هالحدود ..
احنا من سنه او زود شريناه ب10 000 دينار او اشتغلنا عليه باكثر من 7000 وعرضو علينا 20 لكن مانبي نبيع .. ولا نعرف احد حوالينا يبي يبيع ..





مشكورة يا أوزي على التوضيح عن المشروع اليديد..

لاني عارفة روحي كشحة من اروح محل تحل البركات فيه :212:

الله يسهل يارب و نحصل شالية عدل و نصير من فريجكم...