تجربتي مع الفيزا الاسبانية في المكتب الموحد

**ahmed1** · 01-15-2015, 01:54 PM

السلام عليكم

اليوم خلصت إجراءات الفيزا الاسبانية وأخذوا مني البصمات وانتهينا ولله الحمد ، يقولون الفيزا راح تطلع خلال خمس ايام عمل طبعا انا ما صدقتهم ، الموعد كان vip ودفعت عليه 150 ريال ، تجربتي كانت للأسف سيئة جداً جداً مع المكتب لأنه أول شي ما فيه الا كاونترين للفيزا الاسبانية واحد للعوائل والثاني للرجال واي واحد يروح للمكتب راح يلاحظ الفوضى والزحمه عليه، وموقع المكتب سيء جداً في ام الحمام صعب تحصل موقف كانت المواقف كلها حفريات وفوضى مروريه ، انا طلعت لقيت سيارتي فيها حكه من الخلف لذلك انتبهوا من المواقف اذا حصل لك توقف بعيد عن الزحمه يكون أفضل ، طبعاً المسؤول عن الكاونتر حق الفيزا الاسبانية هندي او باكستاني ، للأسف في الغالب سبب الفوضى هم المعقبين اصحاب المكاتب ومعقبين كبار المسؤولين بحيث أنهم ما يتلزمون بالدور يبون يخلصون قبل الكل ، والواضح أن المسؤول الكونتر يحصل منهم المقسوم لأني دائماً أشوفه يتهامس مع بعض الناس ويخلصهم قبل الكل ، لذلك أنصحكم بعد ما تأخذوا الأرقام لا تلتزمون بالدور لأنهم اذا شافوا فيه تنظيم راح يدخلون ناس قبلكم وإذا صارت فوضى يرجعون للأرقام ، انا موعدي كان أمس بس ردوني لأني جبت التعريف موقع ومختوم إلكتروني قالوا هذا ماهو اصلي ، جب تعريف موقع بالقلم ومختوم ختم تقليدي ، اتمنى أني ما ارجع للمكتب مره ثانيه

اذا فيه سؤال انا حاضر من الموبايل