الموضوع: تقريري ملاحظات هامة قبل السفر هدية جنوب افريقيا

ملاحظات هامة قبل السفر الى جنوب افريقيا


اخواني النقاط هذي بالنسبة لي اهم من كل شيء كتبته فوق

لأني وقعت في مصائب بسببها


اولاً : عند تأجير السيارة ، يوجد اكثر من 10 شركات لتأجير السيارات في جنوب افريقيا ، جميعها بلا استثناء ترفض قبول بطاقة الفيزا او الماستر كارد اللي ارقامها غير بارزة

لاحظوا الصورة هنا

http://acakadutdesign.files.wordpres...a_card_big.jpg

الارقام مكتوبة كتابة ، لكنها غير بارزة وهذا النوع يتم رفضه من قبل كل الشركات


وللمعلومية انا سيارتي الاولى اجرتها من شركة National Car Rental

لمدة 9 ايام و كانت رافضة تماماً هذي البطاقة اللي ما كنت جايب الا هي ، وقبلتها بعد محاولات عدة معهم


و في جوهانسبيرغ كنت حاجز سيارة عن طريقة شركة First Car Rental

ورفضت السيارة تماماً انها تعطيني السيارة بالبطاقة هذي

ولما رجعت لشركة الاولى في فرع مطار جوهانسبيرغ ايضاً رفضت لكن لما وريتهم الفاتورة حقت مكتب كيب تاون ، صارت بينهم وبين الفرع اللي في كيب تاون مصارعة بالتلفون ، و اضطروا انهم يقبلونها

يعني انا مشت معاي بفضل من الله و لكن الاصل انها ما تمشي



ثانياً : لكل شخص يبدا قيادة السيارة في كيب تاون ، حاول ان ما يكون مخططك في الايام الاولى الذهاب لـ رأس الرجاء الصالح ، نظراً لان الطريق للمنطقة هذي مخيف نوعاً ما كونه جبلي وكونك توك تحاول تتأقلم على القيادة هناك ، لذلك خل الذهاب لهالمنطقة بثالث يوم بعد ما تتعود على قيادة السيارة ، و علشان اسهل لك الامور ، في اول يوم حاول تلحق السيارات اللي قدامك علشان ما تلخبط و انتبه دائماً اذا دخلت الدوار لا تلخبط ، و اذا حسيت بلخبطة كمل دورة دورتين في الدوار لين تصيد دخلتك الصحيحة
وخذها قاعدة في الشوارع اللي تكون رايح جاي ، الرصيف دائماً يكون على يسارك



ثالثاً : لا تستخدم بطاقة الفيزا الا في المحلات الفخمة و الاماكن المشهورة وابعد عن الكشكات و احذر تغلط غلطتي و تخلي احد ياخذ صورة من البطاقة

شركة اجار السيارات رفضت تستخدم بطاقة الفيزا لأن ارقامها مو بارزة لكن علشان تعطيني السيارة اشترطت علي انها تاخذ صورة من الجهة الامامية من البطاقة و وافقت مع اني كنت متخوف


و بعد 10 اياام بالضبط صارت تجيني مسجات على جوالي انه في عمليات قاعدة تصير على بطاقتي مع انها معاي !

الاخ اللي اخذ نسخة من البطاقة قاعد يشتري من مطاعم و سوبرماركت على حسابي !

الا ان كلمت اخوي و اخوي كلم البنك خليتهم يوقفون البطاقة نهائياً ، الحرامي اشترى بأكثر من 1000 ريال على حسابي

لذلك احذر كل الحذر انك تعطي احد نسخة من البطاقة




رابعاً : سعر اجار السيارة في 9 ايام كان 2273 ريال ، بعد ما اجرت السيارة و انا متجه للفندق ، تفاجئت ان شركة اجار السيارات مسكت مبلغ 7000 ريال تقريباً و هذا الشيء انتبهوا منه

الشركة تمسك هالمبلغ بحسابك و ما تقدر تستخدمه نهائياً و السبب يكون هالمبلغ مثل التأمين في حالة صار لك حادث او صاروا الشركة يطالبونك بأي شيء ، يسحبون من هالمبلغ

المشكلة لما ترجع السيارة ما تسترجع المبلغ على طول ، يكون الاسترجاع اقل شيء بعد 4 ايام و هالشيء تقريباً يدمر اصحاب الميزانيات المحدودة.



خامساً : مافيه شيء اسمه انترنت بلاش في جنوب افريقيا ، حتى في الفنادق 5 ستار - والله اعلم - و الانترنت عندهم غالي .


سادساً : كل المناطق في جنوب افريقيا تجد الرحبية و الروح العالية و الابتسامة الحلوة في كل مكان ماعدا في جوهانسبيرغ الكل معصب - ما ادري ليش -


سابعاً : مدينة صن سيتي خصصت لها يوم كامل بدون ما اسكن فيها ، وهي مدينة تبعد ساعتين و نص عن جوهانسبيرغ و مليانة انشطة لكن يوم واحد ما يكفيها و لازم تسكن ، لأن الطريق في الليل بالرجعة مظلم جداً و مخيف

واغلب الانشطة اللي فيها مثل السفاري و ركوب البالون يبدون الساعة 5 ونص الصباح

وانا وصلت لها الساعة 10 الصباح تقريباً


ثامناً : مدينة صن سيتي - لا تصلح للمتزوجين - من وجهة نظري , مع ان الانشطة فيها جداً رائعة الا ان التفصخ والمناظر الخادشة للحياء في كل مكان مع اني توقعت ما اشوفها الا جنب البرك !


تاسعاً : لمن يملك بلاك بيري و يحب يستخدم البلاك بيري ماسنجر بشريحة جنوب افريقيا ، عند شرائك لشريحة من شركة فودافون ، اطلب من صاحب المحل يفعلها لك و اطلب منه يشغل لك خدمات الانترنت و سعرها تقريباً بـ 35 ريال سعودي ، بعدا ما يشغلها سو ريستارت للجوال و راح تلقى خدمة البلاك بري شغالة مع العلم انها ما تستهلك شيء من رصيدك نهائياً حتى لو حملت روابط صور او مقاطع جوال .


عاشراً : بالنسبة لاسترجاع الضرائب او الـ Tax في المطار ، نظامهم سخيف و غبي ، المطلوب مهو الفواتير بس ، المطلوب كل شيء شريته مع الفاتورة ، شريت تي شيرت ، تجيب التي شيرت مع الفاتورة ، يعني بالعربي لا تقفل شنطتك و هالشيء مستحيل طبعاً ، تجادلت معاهم على نظامهم الغبي ، يعني احنا يالله نسكر الشنطة تبين نفتحها علشان ضرايبكم ، عموماً وجب التنبيه خخخخ .


هذا اللي اذكره و اذا تذكرت شيء ما راح اقصر معاكم

و اخيرا ً

هديتي لكم يا اعضاء المنتدى



رتب جدولك بكل سهولة

ملف وورد لرحلتي كاملة بالتفصيل

الجداول مرتبة و كل شيء مرتب على سفرتي

ما عليك الا انك تغير التواريخ و تحط تواريخك و تغير اسامي الفنادق و تحط اسامي فنادقك وايضاً تغير اسماء شركات السيارات و تحط اسماء الشركات اللي حجزتها انت


وبعدها راح تجيك صفحات للاماكن كل الانشطة في كل مدينة

مدينة كيب تاون باللون الاخضر

جاردن روت بالبرتقالي

جوهانسبيرغ بالبنفسجي

وكل مكان اسمه بالعربي و بالانجليزي - الانجليزي تستفيد منه اذا بحثت عنه بالـ GPS

ومعلومات ايضاً عن المكان واسعار التذاكر - اذا كان فيه اسعار -


تفضلوا حملوه على الرابط


http://www.4shared.com/document/not1JObd/Harmony1.html




ملاحظة كلمة تم بجانب بعض الاسعار كنت استخدمها اذا تم عملية الدفع ببطاقة الائتمان - علشان اعرف من اللي سحب مبلغه و مين اللي لسى -



اتمنى اخواني اني ما ثقلت عليكم واني افدتكم ولو بشيء بسيط

للأمانة اغلب معلوماتي كانت من الاخ فوكس الله يجزاه خير

و انا حاضر لأي سؤال اخواني ولاي استفسار

والان مع صور للجدول ....

يعطيك العافية اخوي معلومات قيمة ونصايح وملاحظات دقيقة ومهمة ،اكيد راح تفيد الاخوة المسافرين لجنوب افريقيا ، الف شكر لك...

اهلاً وسهلاً بالغالي هــــارموني ,,,

اقسم بالله انك بطل يا شيخ ..... معلومات مهمة جداً

ولا شكر على واجب يالغالي فهذا واجبي تجاهك وتجاه جميع الاعضاء

والان يأتي دورك اخي هارموني في توجيه الاعضاء (الاستفسارات تناديك ...خخخخ)

******

عجبني كثيراً جهدك الكبير والواضح لتنظيم رحلتك وتقليل الاخطاء بقدر الامكان

وهذا دليل على حرصك على انجاح رحلتك وهذا باين من الجداول اللي سويتها

واذا تحب اني انزل هذه الجداول على شكل صورة في تقريرك في نفس صفحتك

انا حاضر ومستعد ...

النقاط اللي ذكرتها مهمة جداً وطريقة عرضك للتقرير رائعة بذكرك للتفاصيل
وتقييم الفنادق والروابط والاسعار وستكون اروع اذا كانت مدعومه بالصور ..


ننتظر باقي التقرير والصور ...

نجمة النجوم

الله يعافيك اختي ، وشاكر لك مرورك و تحفيزك

تحياتي




فوكس

هلا بك يالغالي

حاضرين لكل الاعضاء و حاضرين لأي استفسار


والترتيب اللي سويته والجداول هذي كلها فادتني كثير

وعلى فكرة سافرت كثير لكن ما عمري رتبت بهالطريقة الا هالمرة

والسبب لأني ما اعتمدت على مكتب سفريات و رتبت شغلي وحجوزاتي كلها بنفسي



الجداول لو تقدر تنزلها بطريقة صور تسوي خير

كنت بنزلها بصور و ما عرفت الا طريقة تصوير الشاشة وبهالطريقة بتصير زحمة صور هنا

الله يعطيك العافية فوكس ما قصرت



و بالنسبة للصور ان شاء الله بأي وقت اروق ، بشتغل عليها

تحياتي

االحمدلله على السلامه اخوي هارموني

وربي ماقصرت تقرير مميز ..

بس الي بالجدول كل هالبرنامج زرته والا إجتهاد منك ؛؛ ..

تنصح الناس تزور جوهانسبرغ والا تكتفي بكيب تاون وحولها

ميزانية السفره من الباب للباب كم كلفتك ..؟؟

موفق يارب

فوكس

الله يعطيك العافية اخوي ما قصرت




شغب قلم

الله يسلمك اخوي

بالنسبة للأماكن اللي بالجدول هي تجميع مني للأماكن و المعلومات من نفس المنتدى هنا و ترتيبها بطريقة جدول

و زرت اغلبها


اما بخصوص جوهانسبيرغ ، فهي حلوة لكن قبل ما انصحك تروح لها او لا ، لازم اعرف برنامجك كامل

لكن بشكل عام تستحق الزيارة و تعطيها 3 - 4 ايام


ميزانية السفر كلفتني كاملة 30 الف ريال سعودي تقريباً

وتسلم على مرورك وحاضر لأي استفسار ثاني

يعطيك العافية على المعلومات المهمه

وبسالك بشكل عام كم يوم تحتاج لجنوب افريقيا وكم الميزانية لها

السكن لازم فنادق 5 نجوم

انا الصراحه اتمنى ازورها بس للاسف مافي تشجسع

ومتى افضل وقت لزيارتها

وكنت بقولك بنسبة لتاكس فري فهشي موجود حتى باوربا يعني بلندن والمانيا وفرنسا وغيرهم لازم الفاتورة والغرض الي شريته بعد لان ممكن يعتقدون انك تنصب عليهم لان الفاتوره مو اثبات مع ان معضم الفاواتير مختومه من المحل بس هم تفكيرهم غريب

وااااو !!! ما شاء الله تقرييير جبااااااااااااااار
شكرا شكرا شكرا
شكرا على التنظيم وشكرا على ملفات الورد شكرا على توضيح كل شي
لا يسعني ان اقول الا ان الله يجزاك خير ويسعدك
فعلا ساعدتني كثير

يعطيك العافية ماقصرت ممكن تفيدنا اكتر واكتر عن رحلتك انا ناوية اسافر مع زوجي واولادي الثلاثة صغار اكبرهم 7سنوات ايش الأماكن اللي تنصحنا نروحها او مانروحها وزوجي مصر لازم نروح السفارة السعودية في بريتوريا .كيف السفاري في كيب تاون احلى ولا جوهانسبيرج

يعطيك العافية

تقرير رائع ومميز

معلومات مفيدة شكرا لك

يازين الكلام المختصر المفيد شكرا لك

تسلم اخويه على هذا المجهود الرائع والممتاز بصراحه اختصرت عليه الجهد في البحث والتخطيط
راح اعتمد على الخطة المرتبة والنصائح الذهب الموجودة في هالصفحة